عدد الرسائل : 956 العمر : 36 الموقع : في بيتنا نقاط التميز : 4
موضوع: يؤ انقلب الزمن............وش السالفه الإثنين أغسطس 11, 2008 11:55 am
يؤ انقلب الزمن
المشهد الاول: مصرقع الخبر يمشي باحد الاسواق وهو يتلفت يشوف الفساتين قصدي الثياب ويناظر من يمينه ويساره وفجأة الا حس ان واحد من هالاكياس اللي بيده تحرك ولا شعوريا التفت الا بنت رافعه حواجبها وتطالع فيه بعين قويه وهي تقول ممكن ارقمك يا اطخم وبحركه عفويه سحب مصرقع الكيس واسرع يحث الخطا<لو تتعصر يا مغاط ما عرفت هالكلمه>
وهو ماشي بالسوق الا مجموعة بنات وكل وحده بيدها زقاره على بالهم ان التدخين انوثه <هي رجوله بس هماه الزمن انقلب لازم نقلب حتى الامثال والحكم> ووحده منهم تطالع وتقول بس بس بس بس تبي تلفت انتباهي
وانا على نياتي التفت واطالع فيها وهي تقول ارقمك ولا لا وانا اللي احط رجولي بالسوق وانا منحرج واردد ليتني جايب محرم معي ادخل واحد من هالمحلات اللي تبيع ملابس داخليه رجاليه الا واللي تبيع حرمه ومن ادخل يبدا شغل التميلح واروح وامسك واحد من هالصراويل الطويله واقول لو سمحتي بكم هالصروال وتطالع فيني وهي تخزني خزيز وتقول لك انت ببلاش يا عومررررررري
وانا اللي على قولة صدام اقول اطلق ساقيك لا عجلا ولا وجلا واقعد لي بزاويه من زوايا السوق انتظر السواق وانا اصيح واقول هاللي ما يستحون ولا ينتخون الواحد ما يعرف يتقضى ابد ولا يخلون الواحد يشتري مستلزمات حياته من ملابس داخليه وملابس خارجيه وتنسفح دمعه من ماقي العينين باتجاه فناخر الخشم وتختلط بسائل من النخارير الخفيفه وعقبها شفطه داخليه تبلع كل شئ
وشهقة ويعقبها زفره مصاحبه برياح عاتيه من الالم والتعاسه والكابه من هول ما يحدث وعلى جيت السواق ارتحت شوي ويوم جيت ابركب الا عشرات البنات من يميني ويساري وانواع الاوراق عاد البنات عندهم الوان رايقه وردي واصفر وبرتغالي وكل وحده كاتبه رقمها واللي تقول يا مملوح انتظر الوووه الليله واللي تقول اموووت فيك<مات حظها امداها تموت تونا ما قلنا الوووه> واللي تقول ياليتني كيس بيدك واللي تقول ياليتني شنب فوق براطمك واللي تقول اغدى سكسوكه في وجهك واللي تقول اغدى حبة خال في ركبتك وانواع الازعاجات وعقبها ينفجر مصرقع الخبر وبصوت عالي وهو يقول اعنبووووووكم استحو يا تزليلات الحياء تخيلوا
بنات يلاحقون اخوانكم ترضونها هاااه ترضونها واسكر الباب بقوة لان مصرقع الخبر تعرض لبعض الحركات اللي ما تنذكر هنا مثل<طووووووووووووووط> و <طووووووووووووووووووووووط> تم حذف تلك المقاطع من قبل الرقابة على المصنفات الفنيه المشهد الثاني السواق يتحرك الى خارج الباركنج حق السوق وفجأة صوت بريكات قويه وصدمه حركت مصرقع والاكياس والسواق الهندي نزل السواق يشوف وش السالفه ومصرقع يا حبة عيني جالس ورى وهو خائف لا تصير الصدمه جامده وشوي الا ينفتح الباب وتدخل بنت قرده لابسه برقع شكلها عربجيه
وهي تقول هذا رقمي يا اطخم ان بغيتنا نصلح سيارتك كلمنا عليه وفجأة انفتحت البيبان كلها ودخلوا مجموعات متتاليه من البنات كل وحده تدخل وتحذف رقمها اللي داقه النقاب واللي كاشفه واللي لابسه برقع واللي لابسه غدفه واللي واللي الين ما صوت للسواق
وقلت امش بسرعه ويوم ركب قلت من اللي صدمنا قال بابا هذا فيه بنت لابسه خيمه قلت قصدك اللي لابسه برقع قال ايه وارتحت يوم طلعنا من السوق وابعدنا وحنا عند الاشاره الا مجموعه اخرى من البنات واقفين بجنبنا بددسن غمارتين وكلهم شيون ووحده منهم اللي من ناحيتي تطلع ورقة كبيره مكتوب عليها الرقم وتحتها عبارة <فوووور سيل> يعني للبيع وانا اردد واقول لا يا تزليلات الحياء ياللي ما فيكم لا نخوه ولا بركه ولا نفع انتم بنات المستقبل وعماد الوطن ولازلتم على هالحركات البناتيه على وزن الصبيانيه المشهد الثالث مصرقع الخبر اخر الليل وهو منسدح على السرير ويلعب في شنبه وقاعد يقرا مجلة شعريه صفحة الخواطر وهو يتنهد وفجأة دخل
الشيطان بالموضوع وقرب من اذان مصرقع وقال ليه ما تنحرف قال مصرقع لا لالالا كلش الا الانحراف مستحيل امبييييييه ما اقدر قاله الشيطان وهو يوسوس عند اذنه الثانيه لان الظاهر اذنه الاولى ممتليه شمع وهو يوسوس ويقول جرب مش حتخسر سدئني تعوذ مصرقع من الشيطان وقال انتزلع لابارك الله فيك يا وسواسي قال الشيطان وراك وراك وراك ان ما خليتك تنحرف لا تسميني شوشو فكرت
بكلام شوشو وقلت ما يضر اضيع وقت بالتلفون بس وفكرت ومسكت سماعة التلفون ويدي تحكني وخذيت ورقة البنت المبرقعه اللي صدمتنا ودقيت او الارقام ويوم سمعت صوتها استحيت بقوة وسكرت السماعه وانا انتفض واقول ياربي خايف خايف واتشجع وارفع السماعه مره ثانيه وادق الرقم وترد على البنت المبرقعه نفس الصوت الرخيم القوي
البنت المبرقعه: نعم مصرقع : بصوت خافت وواضح انه مستحي هلا البنت المبرقع: هلاوين من انت مصرقع: انا الشاب اللي كنت اليوم مع السواق وصدمتينا المبرقعه: هلا وغلا كان عندي احساس انك بتكلم مصرقع : انا مكلم علشان اقولك ان الصدمه خفيفه ومانبي منك شئ المبرقعه: ادري ان اللي ابقوله لك يا اطخم ما راح تصدقه لكن انت من دخلت للسوق وانا امشي وراك وكنت منقهره من البنات اللي يضايقونك وتابعتك الين ما ركبت مع السواق وقلت مافيه فرصه اني اتعرف عليه الا اني اصدم السواق صدمه خفيفه علشان اعطيه
الرقم باسلوب حضاري مصرقع: بس احرجتيني وحطيتيني في موقف لا احسد عليه وخصوصا اني بلحالي مع السواق كيف طاوعتك نفسك تحطيني بهالموقف المبرقعه: انا شاريتك من شفتك نغزني قلبي نغيز وقلت لا يمكن افرط فيك مصرقع: يالله يالله بااااي اسمع خرفشة بيبان وطررررقع بالسماعه الليله اللي بعدها يكلم مصرقع المبرقعه مصرقع وهو يحنحن صوته: الوووووووو المبرقعه: نعم مصرقع: ونعامه ترفسك كير كير كير كير ضحكة دلع المبرقعه: بعد قلبي هالضحكه تجنن حياتي مصرقع وقد خارت قواه: وشلون حياتك
المبرقعه: ايه حياتي ان حبيتك<بدت تقص عليه> والبارح ما عرفت انام احس ان صوتك جرس موسيقي باذاني كل ما قلبت على ناحيه سمعت نداء بصوتك يقول الووووه وبدال ما اقعد اعد الخرفان علشان انام قعدت اقلد صوتك وانت تقول الوووو 1 الووووو2 الوووو100 الين ما نمت يا عومررري مصرقع: حتى انا اشتقتلك واجد<خارت قواه وانلعب عليه بكلمتين> المبرقعه: طيب اذا تحبني عطني بوسه مصرقع<مستحي ومشتهي> وبصوت يبين انه زعل: نععععععم المبرقعه: حياتي ما انت تحبني وتموت فيني مصرقع: ايه ----------------> من هنا بدا الانحراف المبرقعه: عطني بوسه تعبر عما تحس به من جوف قلبك مصرقع: طيب انا استحي
المبرقعه: ادري انك يا عومرررري مستحي وخجلان لاني اول بنت بحياتك وراح اخليك تردد القصيده اللي تقول انت البدايات واخر ساحل وميناء<الله من واحد واحد هالايام يرددها على هالمخفات> مصرقع: طيب اابوسك وابسكر السماعه لاني ما اقدر اتحمل المبرقعه: طيب يا حياتي مصرقع: اممممممممممممممممممممممموه يؤ يؤ <هالكلمتين بيجيبون حمود المستلج> سكر مصرقع السماعه وانبطح على السرير وهو يحس ان قلبه بيوقف من السعاده فقد وجد فارسة حياته وهو قاعد على السرير نام
وحلم ان حبيبته المبرقعه راكبه بغل ابيض وهي لابسه ملابس الفرسان وجايه تركض دربق دربق دربق وهو ماد يديه لها علشان تلقطه وتردفه معها وهو ماد يديه الا ويسمع حس واثر يديه ماسكه بالابجوره اللي بجنب راسه وهو يضحك ويقول يؤ شكلي حبيت المبرقعه متى يجي الليل وتنام العالم واكلمها بدت المكالمه تكثر وصار مصرقع والمبرقعه روميو وجوليت الصمان والقيض حاديك ايا حسين الدل وايا المطيه
واكمالا لقصة الحب اللي بدت بالسوق تقدمت المبرقعه هي واهلها علشان يخطبون مصرقع المشهد الرابع والاخير
المبرقعه واهلها جالسين في المجلس وحولهم اهل مصرقع الخبر وهو جالس متكشخ بالمطبخ وهو لابس البسام البصمه12<يمديه نزل ذاك الوقت> وهو يقول للشغاله بسرعه صلحي الفيمتو اللي باقي من رمضان خلينا اقدمه لهم مصرقع يدخل وهو طاقه الحياء وطاق اللطمه ويقدم الشربيت للمبرقعه وهي تطالع فيه بابتسامه
وبعدين يقدم لاامها وابوها الشربيت وهو يقول يؤ<حياتي الخجل جزء من شخصيته> ويقدم الشربيت لاابوه وامه وفجاة يحط الصينيه على الطاوله ويركض باتجاه الباب لانه ما يتحمل هول الموقف<< ههههههههههههههههههههههه اصبروا عجزت لاابلع هالموقف حامت تسبدي وانا اتخيله
ويتفقون اهل مصرقع واهل المبرقعه ان الرد بيجيهم لما يسئلون عن بنتهم واخلاقياتها وفي يوم جت ام مصرقع وابوه وقالوا يا ولدي المبرقعه ما تصلحلك حنا كلمنا اهلها وقلنا لهم ان بنت عمك خاطبتك ورافضه تتنازل عنك لان البنت طلعت داشره ومغازلجيه ومافيه شاب من هالشباب المساكين ما تلحقه وترقمه رضخ مصرقع للامر الواقع وفي الليل كلم المبرقعه مصرقع: الوووووووو المبرقعه: نعم وش تبي مصرقع: احوووووووووووووووووووووبك المبرقعه: حبك برص نعم وش تبي مصرقع: ليه يا عووومري تكلميني بهاللهجه انا مالي ذنب باللي صار تعرفين عندي اولياء امور هم المسئولين عني وتعرفين يهمهم مستقبلي وخايفين علي وعلى الجيل المستقبلي للعائله المبرقعه: من زين وجهك اللي تسنه قنفذ منخرع يخافون عليك مصرقع: نعم بدينا بالغلط ما الشرهه عليك الشرهه على اللي يكلمك يا بايخه كش عليك< عسى ما عورتها بس> المبرقعه: يتحمدون الله اللي ابفكك من العنوسه<افاااااا راحت الرجاجيل
> مصرقع: طرررررقع بالسماعه وهو متحطم ومنكسر القلب ويبكي بحراره وقعد يصيح عاد تخيلوا هالموقف الرهيب وكل واحد منكم ويتخيل الموقف واااااااااااااااااااااااااااااااء مدري ليه احس ان هالموقف رهيب
وهي لحظات انكسار القلب وتحوله الى شظايا عاد بعد هالنهايه المأساويه لقصة روميو وجولييت الصمان تخيلوا مصرقع الخبر يرفع عليكم السماعه ويكلمكم زي ما كلم المبرقعه اول مره وبصوت حنون ودافي ورخيم ومسموع ويقولكم مصرقع: الووووووووووووووووووووووووووووووووووووووووو : نعم مصرقع الخبر : اطلعوا من حياتي
شموووخ إنسان مشرف
عدد الرسائل : 991 العمر : 44 الموقع : في الخرج نقاط التميز : 6
موضوع: يؤ انقلب الزمن............وش السالفه 
الإثنين أغسطس 11, 2008 11:55 am
